Панїматка АМАЛИЯ ХОЛОШНЯЙ -
Руководзаца и одвичательна особа Общества у вопросох хуманитарно-социялних активносцох,
хтору мож вше контактовац, задац вопрос, виповесц завагу, висловиц даяки особни предклад, на злєпшованє ефекту хуманитарно-социялних активносцох общества.
Контакт тел: +381 65 503-7626
ХАРИТАТИВНА ДЇЯЛНОСЦ ЦЕРКОВНОГО ОБЩЕСТВА
Демоґрафски вигляд церковного общество у Дюрдьове ше нї зо щим нє розликує од общого смутного демоґрафского стану цалого тутейшого поднєб'я. Остаретосц популациї, нїзки уровень наталитету и нєпреривна тенденция одходу младшого пасма жительства, чи до векших городох, чи загранїчя, нєвигодно ше одражує нє лєм на виталносц парохиялного виолоґийного корпусу, алє и на драматичносц социялних обставинох , хтори залапяю вельке число семействених заєднїцох.
Праве прето пред нашим обществом стої вельке и приоритетне виволованє поднїмац ше процивставаня и зражя з тим вельким нєдугом. А можлївосци нє розкошни.
Заж лєм систематичнєйших и вецейрочно-тирвацших активносцох на полю указованя гуманитарно-социялнейней материялней помоци парохияном єст. Нашо общество уключене до каждорочного ярнього додзельованя пенєжней пожички, насампредз за польодїлску дїялносц, хторе иницировал Каритас Апостолского ексархату за грекокафтолїкох у Р. Сербиї. Тоти активносци тирваю уж єдну полну децению (од 2006. р.), а з нїма облапени приблїжно 50 семейства, и знова и знова ше указую за їх хасновательох як барз обчековани, хасновити и материялно подзвигуюци.
Ношаца особа хтора ше прияла тей нєлєгкей и одвичательней роботи, то панїматка и дзиячка Амалия Холошняй, на чим єй треба благодариц и указовац єй як моралну так и конкретну потримовку, насампредз административней природи. А Господь Бог, най ю за тот пожертвовни труд милосердно наградзи.
"Тото цо сце зробели єдному од малих, тото сце мнє зробели".
Господь наш Исус Христос
Роздзельованє тей помоци нє було би можлїве без "подупреца власних плєцох вжац и ношиц на нїх мещки кромпльох" безвозмездних волонтерох хтири у тей дїялносци водзени лєм зоз єдиним благородним мотивом Чловеколюбия.
Довириє руководзиц зоз тим благородним подняцом дате панїматки Амалиї ХОЛОШНЯЙ. Познаваюци шицки фамелиї дюрдьовского общества єй обовязка и одвичательносц зробиц за кажди мешац вибор 25/30 социялно найзагроженших семействох, а и саме розподзельованє вона окончує особнє и зоз всещедру волонтерску, а за такей файти дїялносци и зоз нєобходну хлопску физичну помоцу Йовґена МУДРОГО з Нового Саду.
З початку кратши час у тей активносци розношеня гуманитарней помоци брала учасц и парохиянка Вера ДУДАШ, дзечнє кладзаци на розполаганє особну превозку, и сама провадзаци розподзельованє помоци.
РАЗ-МЕШАЧНЕ ДЗЕЛЄНЄ ПОМОЦИ ФАМЕЛИЙОМ У ПОТРЕБИ
Друге значне благотворне подняце нашого общества на харитативним уровня представя систематичне, порядне - размешачне дзелєнє помоци з елементарнима потрбщинами, продуктами за єдзенє, хиґиєну и санитарию.
Тото дзелєнє помоци без претаргнуца тирва од 2012. р. а оможлївели го людзе доброго шерца и волї зоз Швайцарскей, а з поштредняцтвом познатей дюрдьовскей цивилней рижно-напрямовей активисткинї, панї Моники Брукнер.
Раз мешачно приблїжно 25 / 30 материялно найугроженши семейства у валалє доставаю пакети у пенєжней проциввредносци од 2000 дин.