ГРЕКОКАФТОЛЇЧЕСКЕ ЦЕРКОВНЕ ОБЩЕСТВО
При св. Храме Рождества Пресвятей Богородици - Дюрдьов
ХРИСТИЯНЄ "ДВОЙНЇСТОГО ЄДИНСТВА"
Каждому хто приходзи до нашей Церкви (церковного общества вирних), обчекуюци медзи нами найсц завидне моралне совершенство и розквит медзисобней любови, муши ше щиро припознац: Начишлєни особни прикмети представяю у наши обществе - нєпреривно оганяци циль, алє су и нєпреривни дефицит, часто нє у малей мири.
Зоз того виходз же ше каждого приходнїка до нашей Церкви - обчековача праве ту найсц полноту святосци, миру, спокойства и здравя, як физичного так и духовного, муши розчаровац зоз припознаньом одсуства обчекованого.
Лєм того хто приходзи зоз интенцию у Церкви нашого общества найсц насампредз - Бога, почувствовац Його блїзкосц и Його застаране отцовске будносцованє над своїма чадами, можеме завериц же ше нашол на правим месце, и щиро поволац вєдно зоз нами крочиц до поєдинєчней борби каждого зоз "самим собу", а з цильом звладованя каждей своєй особней нєсправедлївосци и одцудзеносци од Бога и Божих идеалох.
Праве дефицит християнских чеснотох, дефицит любови и ґу Господу и ґу своїм блїжнїм дава смисел нашого єствованя. Нашо вирске общество постої же бизме водзаци борбу зоз самима собу поступнє вирастали, и крочай по крочай доходзели до вирних подражовательох "Живота Христа".
Витайце у нас, витайце у нашей Церкви, у нашим церковним обществу, и пребачце нам нашу духовну инвалидносц и ощербеносц. Но щиро обецуєме: "Постараме ше, праве и зоз вашим присуством и помоцу, злєпшац самих себе, а по углядзе и на Образ Господа нашого Исуса Христа".
"Же би шицки єдно були"! Дакус висшей приложена фотоґрафия историйного стретнуца першоиєрархох Заходней Римскей Церкви - Папи Франциска и Восточного Константинопольского Патриярхату - Варфтоломея, хторе ше одбуло нєпоштредно после остатнього папского вибору у 2013. р. в Риме, представя плакатни приказ нашого похопйованя нас самих, нашу самоидентификацию:
"ЦЕРКВА ДВОЙНЇСТОГО ЄДИНСТВА"
ΕΙΣ ΜΙΑΝ, ΑΓΙΑΝ ΚΑΘΟΛΙΚΗΝ ΚΑΙ ΑΠΟΣΤΟΛΙΚΗΝ ΕΚΚΛΗΣΙΑΝ
У конкретним валалским штредку населєня - Дюрдьов, дзе зме зоз задумку Божу положени, и у тим чаше до хторого нашо єствованє уткане, жадаме буц, як то зжато и лєм зоз трома словами кратко висловел визначни мелкитски грекокатолїцки надвладика Баалбекийски Илия Цоґхби зоз Ливану, учашнїк Другого Ватиканского собору у його замеркованим писаним дїлу: Розпарани Ризи заплатац - Правдива Церква Двойнїстого єдинства. Праве з таку духовну физиономию, пилнуюци витвориц у себе, як нас нєпреривно поволує зоз официйнима документами папска Конґреґация Восточних Церквох, свой автентични, жридлови, нєощербени прицагуюци и мисийно розположени власни идентитет, видзиме смисел и провидїниє нашого иснованя и шведоченя. Вериме источашнє, же зме з єдного боку - Бога правилно славяци, православни християнє, а з другого - визнавателє и припаднїки єдней святей соборней кафтолїческей и апостолскей Церкви, же зме повязуюци мост двох єднак богатих и нєвичерпних церковних духовних традицийох Востоку и Заходу, же зме члени єдного нєрозпараного Цела Христового, хторе бере животни воздух свойого диханя нє покалїчено и зоз хибу єдного орґану, алє подполно - зоз обидвома плюцовима кридлами.
ҐАЛЕРИЯ ФОТОҐРАФИЙОХ НАШИХ ПАРОХИЯНОХ
 |  |  |
|---|---|---|
 |  |  |
 |  |  |
 |  |  |
 |  |  |
 |  |  |
 |  |  |
 |  |  |
 |  |  |
|  |  |
 |
НАЙЗНАЧНЄЙШИ ДАТУМИ З ВИОҐРАФИЇ ОБЩЕСТВА
○ ПЕРШЕ ЦЕРКОВНЕ ОБЩЕСТВО / Перше церковне Грекокафтолїческе церковне общество за руских приселєнцох зоз Руского Керестура и Коцура, котри ше численше до Шайкашкей почали присельовац у другей половки ХIХ в. було у формално-правним смислу основане 12. децембра 1892. р.
○ ПЕРША БОГОМОЛЯ / Перши модляци простор бул адаптовани у преднєй хижи приватного обисца богобойного дюрдьовского жителя Дюри Виславского, цо на нєшкайшим Руским шоре, ч. 46. Вон бул з боку Крижевского владичества одобрени за богослужацу употребу зоз чином пошвецаня на швето Трох Святительох (Василия Велького, Григория Богослова и Йоанна Златоустого) 18. фебруара 1880. р.
○ ДРУГА ЦЕРКВОЧКА / истого Лїта Господнього 1880. перша молитвена богомоля була премесцена до ново-купеного обисца находзацого ше на месце дзе нєшка стої Руска школа. пошвецена була на "Михала", 21. новембра 1880. р.
○ НЄШКАЙШИ ПАРОХИЯЛНИ СВ. ХРАМ / Будованє нєшкайшиго парохиялного св. Храму за-почало в яри 1900., а уж концом истого року, на швето св. архангела Михаила, 21. новембра була зоз предшедательством владики Юлия Дрогобецкого пошвецена на мено "Малей Матки Божей", односно празднїк Рождества Пресвятей Богородици.
○ ИКОНОСТАС / поставени даскельо роки после будованя парохиялного св. Храму, а зоз професионално-поштреднїцку поднїмательску услугу предавательно-виробююцого подприємства за виробок церковней утвари Алойзия Тауша з Нового Саду. Царски и Дияконски дзверка виробени у австрийским городзе Райхенау з рукодїлом образотворчого живописателя Франца Янди. Други образи на иконостасу, як зазначел о. Дюра Биндас у Парохиялним лїтопису, зробени якбачу дзешка у Чехословацк
○ ДЕКОРАТИВНЕ МАЛЬОВАНЄ ИНТЕРИЄРУ / Перше нукашнє декоративне мальованє зоз фло-ристично-ґеометрийнима мотивами окончел новосадски декоративни художнїк А. Годованї 1914. и пошвецен 19. юлия истого року.
○ ОБНОВЕНЄ МАЛЬОВАНЯ НУКАШНЬОСЦИ ЦЕРКВИ / Пре причину препаднутосци закрица церкви перше нукашнє декоративне мальованє було нєодлуга по його виробку у велькей мири очкодоване. Лїта Господнього 1970. темельней обнови омальованя храмового интериєру поднял ше Василь Уйфалуши - Руснак з Нового Саду, а дюрдьовчань по походзеню. Успишна копийна робота Уйфалуша свойого предходнїка Годованїя, була дзень после Ґосподїнского кирбая, 22. новембра 1970. у присустве двох владикох, Крижевского Гавриїла Букатки и Йоакима Сеґедия, зоз литургийним тор-жеством святочно пошвецена.
○ ОЧКОВО СКЛЄНЯНИ ОБРАЗИ / Зоз спонзорством владики Крижевского Славомира Микловша, 2003. дюрдьовски парох о. Йоаким М. Холошняй дал у сомборскей витражней роботнї Станишич справиц 16 нови мальовани образни очка по художествених рисункох священїка Михаила Холошняя. Вони були на Малу Матку Божу - Дюрдьовски кирбай, 21. септембра 2005. з чинодїйством пошвеце-ня преосвященого владики, Апостолского ексарха за грекокафтолїкох у Р. Сербиї, кир Георгия Джу-джара и Крижевского Славомира Микловша сакрализовани за литургийно-модляцу употребу.
○ ОГЕНЬ / Року Божого 2006. дюрдьовске церковне общество нащивела велька бида у подоби застрашуюцого огня у св. Храме, зоз хторим до нєвозврату однєшени штири иконостасни образи, а други прецерпели велькорозмирни очкодованя. Цалосне декоративне мальованє интериєру було ощербене зоз його прекрицом з пирньовим пасмом чарнїдла, и очкодовани патосни цегелки у олтаре.
○ ОБНОВА З ОГНЬОМ ОЧКОДОВАНЕЙ ЦЕРКВИ / з спонзорством владики Крижевского Славомира Микловша, 2003. дюрдьовски парох о. Йоаким М. Холошняй дал у сомборскей витражней роботнї Станишич справиц 16 нови мальовани образни очка по идейних художествених нарисох о. Михаила Холошняя.