ДЇЯЛНОСЦ ПИСАНОГО СЛОВА ОБЩЕСТВА
Же би СЛОВО БОЖЕ - ДОБРА (БЛАГА) ВИСТКА о Царстве Божим ефективнєйше доходзела до пастви, нашо общество ше старало по своїх скромних можлївосцох з часу на час видац даяку публикацию з духобним поучуюцо-казательнїцким змистом, намагаюци ше насампредз, з писаним словом поспишовац процес воцерковйованя своїх парохиянох. Праве з таку основну думку було 2005. р. иницироване видаванє ПАРОХИЯЛНОГО БЛАГОВИСТНЇКА, хтори попри информативних статйой о рижнородних збуваньох у живоце парохиялного общества, сотримал у себе и святоотцовски духовни чтива, як и статї зоз обласци историї Дюрдьовскей парохиї. На жаль, пре нєвигодно подли материялни стан общества, змогло ше видац лєм шейсц числа спомнутого ПАРОХИЯЛНОГО БЛАГОВИСТНЇКА, у нєдлугоким тророчним периодзе од 2006. по 2009. рок. (Опатьце фотоґрафию на самим сподку того боку).
МОЛИТВЕНЇК "МИР ВСИМ" - Дюрдьов 2007
Зоз архиєрейским благословом владики Крижевского + СЛАВОМИРА (Микловша), на саме Швето Рождества Христового по григориянским календарним стилу, 25. децембра, Лїта Господнього 2002. у Заґребе Дюрдьовскому церковному обществу дате допущенє за пририхтованє видаваня молитвенїка на бачванско-сримскей рускей бешеди южно-славянских Руснацох. Пририхтованє закончене о нєкратки пейц роки, так же Молитвенїк МИР ВСИМ, видруковани у новосадскей друкарнї "Стойков", у тисяч прикладнїкох конєчно шветлосц дня, а на радосц велїх такей файти духовного чтения жадних, збачел 2007. р.
Молитвенїк ма 584 боки, видруковани є на кунстдруку, зоз твардима рамиками и златооциском на твари, хрибце и рикни. Ма два означуюци пантлїчки, а тексти збогацени и зоз даскелїма репродукциями иконох и векшим числом декоративних винєтох, заставками, инициялнима буквами и кончиками. На самим концу Молитвенїка єст и даскельо празни боки за особни записки, лєбо особни модлєня. Зоз своїм красним вонкашнїм естетским випатрунком здатни є и як прекрасни дарунок, окреме за християнски швета лєбо значнєйши духовни збуца (кресцини, Перша Причасц, Имени дзень, паломнїцки путованя и подобне).
О пресладки и вшещедри, Исусе, прим тераз тото мале модлєнє нашо, як цо ши приял два ґдовицово динарчки; и зачувай нашлїдство Твойо од видлївих и нєвидлївих нєприятельох, од набегох цудзинцох, од хороти и гладу, од каждей нєволї и смертельней рани, и виратуй од будуцих мукох шицких, Тебе воскликуюцих: Алилуия! (Кондак 11. з Акафисту Найсладшому Господу нашому Исусови Христови)
ЗБОРНЇК ВИБРАНИХ ПИСНЬОХ ЗОЗ ЛИТУРГИЇ, САНОЧНА И ПАРАСТАСУ
КАРПАТОРУСКОГО РОЗШПИВУ
У рамикох означованя 250-рочнїци приселєня Руснацох зоз Горнїци до Бачки, хторе ше одбуло 2005. р. нашо Общество у сотруднїцстве зоз новинско-видавательну установу "Руске Слово", публиковало нотни зборнїк за употребу штирогласним мишаним хором, до чийого змисту вошли часци зоз богослуженьох: Служби Божей, вечурнї, утринї и парастасу. Карпаторуски простопийни богослужебно-канонски мелодиї у редакциї священїка, Протоєрея ставрофора Йоакима М. Холошняя, художествено гармонизовала Мария Холошняй.
ХОРСКЕ ШПИВАНЄ У ЦЕРКВИ РОЖДЕСТВА ПРЕСВЯТЕЙ БОГОРОДИЦИ У ДЮРДЬОВЕ (1918 - 2006)
У рамикох означованя 250-рочнїци приселєня Руснацох зоз Горнїци до Бачки, хторе ше одбуло 2005. р. нашо Общество у сотруднїцстве зоз новинско-видавательну установу "Руске Слово", 2006. р. публиковало нотни зборнїк за употребу штирогласним мишаним хором, до чийого змисту вошли часци зоз богослуженьох: Служби Божей, вечурнї, утринї и парастасу. Карпаторуски простопийни богослужебно-канонски мелодиї у редакциї священїка, Протоєрея ставрофора Йоакима М. Холошняя, художествено гармонизовала Мария Холошняй.
КРАЧУНСКИ ЛИТУРГИЙНИ ПИСНЇ И КОЛЯДИ (компакт-диск)
У виполнєню хору "РОЗАНОВ" нашо Общество 2010 р. видало ЦД зоз Крачунскима литургийнима писнями и колядами у тисяч прикладнїкох. Дириґенка: Татиана Барна; текст и художествене оформенє обложки: священїк Михаил Холошняй - Матїйов.
ПАРОХИЯЛНИ БЛАГОВИСТНЇК
ПАРОХИЯЛНОГО БЛАГОВИСТНЇКА, хтори попри информативних статйой о рижнородних збуваньох у живоце парохиялного общества, сотримал у себе и святоотцовски духовни чтива, як и статї зоз обласци историї Дюрдьовскей парохиї. На жаль, пре нєвигодно подли материялни стан общества, змогло ше видац лєм шейсц числа спомнутого ПАРОХИЯЛНОГО БЛАГОВИСТНЇКА, у нєдлугоким тророчним периодзе од 2006. по 2009. рок. (Опатьце фотоґрафию на самим сподку того боку).
БОЖЕСТВЕНА ЛИТУРГИЯ
&
ВОСКРЕСНА УТРИНЯ
У виполнєню Семейственого хору "ХОЛОШНЯЙ"
(компакт-диски)
З нагоди церковного торжества молитвеного преславйованя 2000-рочнїци велькей подїї покресценя восточно-славянских народох Києвскей Руси, а у рамикох Крижевского владичества, нашо общество 1998 видало аудио-кассету БОЖЕСТВЕНЕЙ ЛИТУРГИЇ Св. Йоанна Златоустого, а у виполнєню Семейственого хору "ХОЛОШНЯЙ". Виданє було вецей раз повторйоване, а 2014. р. и на компакт-диски як найсучаснєйшому ношачу звука.
У истим семейственим виводзеню камерного дзевецчленового фамелийного составу "ХОЛОШНЯЙ", Дюрдьовске общество видало 1995. р. и цалосни аудио-знїмок ВОСКРЕСНЕЙ (ПАСХАЛНЕЙ) УТРИНЇ зоз карпаторуским простопийним розшпивом, гармонизованим за штирогласни мишани хорски состав. Першобутне аудио-виданє на аудио-касетти, умножене у 450 ексемпларох, було 2014. року диґитализоване и видате и на компакт-диску як ношачови звуки.
У ПРИРИХТОВАНЮ
Уряд при Министерству Правди Р. Сербиї за сотруднїцство зоз Церквами и вирскима заєднїцами одобрел за тот чечуци 2016. рок, а на основу розписаного конкурсу, Ґосподїнскей парохиї финансийни средства за реализованє подняца защити конзервациї и реставрациї найстаршей Одлоговей церковнославянскей друкованей кнїжки. Подняце би по догварки мушело буц реализоване до конца рока. Нашо оДюрдьовске церковне бщество ше тому позарядово значному проєкту прибрацковало на таки способ же иницировала и пририхтованє провадзацей публикациї зоз шлїдуюцу назву:
Одлогов прикладнїк НОВОГО ЗАВИТУ З ПСАЛТИРОМ МОСКОВСКОГО ПЕРШОПЕЧАТНЇКА ИВАНА ФËДОРОВА
от Лѣта Господнього1583.
У кнїжочки будзе фото-документовани сам роботни процес шицких защитно-конзерваторско реставрацийних роботох специялизованого оддїлу за таки фахово подняца при Народней библиотеки Сербиї у Беоґрадзе.
Вшелїяк предвидзени и опис самей кнїжки и историят єй зяювеня праве у Дюрдьове, у приватней библиотеки покойного владики Славомира (Микловша), и на самим концу у Рускей Одлоги. Змист публикациї предвидзує и кратку биоґрафию и опис дїла друкара кнїжки - Першопечатнїка Московского Ивана Федорова.
Благодаряци материялней потримовки Уряду за сотруднїцство зоз Церквами и вирскима заєднїцами при Министерству Правди Р. Сербиї и Општини Жабель, тих дньох вишол з друкарнї нови ЦД хору "РОЗАНОВ", до чийого змисту вошли 18 нови БОГОСЛУЖЕБНИ ПИСНЬОШПИВИ нашого хору.
