Протоиєрей ставрофор ЙОАКИМ М. ХОЛОШНЯЙ
АНФТОЛОҐИЯ виртуозного солошпиву Дюрдьовского пароха, Протоиєрея ставрофора Йоакима М. ХОЛОШНЯЯ
На лївим боку тей сайтовей странїчки положена лїстина вибраних звучних записох солошпиву о. Йоакима Холошняя. Вона представя анфтолоґийни вибор найудатнєйших вишпивох протиоєрея Йоакима церковно-славянских духовних художествених композицийох, як и канонских народних мелодийох карпаторуского розшпиву, хтори були, технїчно патрено, на рижни способи записани, у єдним длугшим часовим периодзе, од 1958. по 2010. рок.
1. Знїмок од велькей историйней значносци, подполно бизовнє - найстарши звучни запис хорского шпиву при Руснацох зоз 1958. р. Конкретнєйше, на Руско-Керестурски кирбай спомнутого року за священїка бул пошвецени о. Йоаким Холошняй. На святочним полудзенку там присутни богослове Крижевскей епархиї и священїци, члени семинарского хору богословох зоз хторим руководзел о. Владимир Тимко одшпивали даскельо вецейгласни хорски композициї. Перша приложена нумера у лївим албуме того боку, представя Сугубу ектению зоз одповедацим Тройнїстим "Господи помилуй". Соло партию шпива 26 рочни неоиєрей о. Йоаким М. Холошняй.
2. & 3. & 4. Знїмок зоз 1958. р. - Хор духовенства Крижевского владичества на Руско-Керестурски кирбай и презвитерске пошвецанє о. Йоакима М. Холошняя. Священїчески возгласи чита владика Гавриил Букатко, а хор шпива Отче наш - Римский-Корсакова и прочая. Закончуюци возглас многолїтствия шпива неоиєрей Йоаким Холошняй, хтори на концу (нумера 4.) отримал кратке благодаряце слово и поздрав слухачом предстояцого звуко-запису. Зоз хором духовенства дириґує о. Владимир Тимко.
5.Треца нумера, по хторей наволани приложени албум: Под твою милость, представя виривок зоз аудио-запису першей касети медзи южно-славянскима Руснацами з назву: Перша часц саночного - Велька вечурня з литию, а у виполнєню Семейственого хору "ХОЛОШНЯЙ", видатей от швайцарского музичного здруженя "Arts Byzantins" зоз Флиели Ранфту (Flüeli Ranft), 1983. р. у Швайцарскей, а з подняцом хороводителя Швайцарского византийно-славянского хору "РОМАНОС" - пана Петра Витовца.
6. Шеста нумера - Євхаристийни канон представя виривок аудио-запису концерту обєдинєних хорох "РОЗАНОВ" зоз Дюрдьова и Швайцарского хору "РОМАНОС" у православней Митрополитанскей церкви у Темишваре, 1998. р.
7. & 8. Законченє Сугубей ектениї зоз священїческим возгласом и Велїчаниє, на часох Воскресней (Пасхалней) утринї представя виривок видатей лонґ-плейки, двотомней аудио-касети, а на концу и ЦД-а, у виполнєню обєдинєних хорох "Руссикуму", Швайцарского хору "РОМАНОС", и "СЕРҐИУС" - хору зоз Вайнґартену (Нємецка). Знїмок справени 1983. р.
9. & 10. Отче наш - Аркадия Дубенского и Блаженства болгарского композитора Добри Христова, у соло вишпиву протоиєрея Йоакима, а у провадзеню мишаного хору Церкви Александра Нєвского и з хороводительством Димитрия Димитрова, записани у тезоименїтим Софийским катедралним храму, 14. октобра 1998. р.
11. Протоиєрей ставрофор Йоаким М. Холошняй бул солиста хору "РОЗАНОВ" од його снованя, хторе ше збуло 1996. р. Єденаста нумера тутейшей Анфтолоґиї - Нинї отпущаєши - Серґея В. Рахманїнова представя запис з самостойного цаловечаршого концерту хора "РОЗАНОВ" у Новосадскей синаґоґи, 16. мая 2008. р.
12. Єдина нумера карпаторуского церковного розшпиву, часц Служби Преждеосвящених Дарох - Да исправится молитва моя, була презентована болгарским софийским слухательом на заєднїцким концерту: Швайцарского хору "РОМАНОС", Ансамбла Йоанн Кукузель под руководительством дириґента Димитрия Димитрова, як и ad hoc камерного составу зоз Семейственим хором "ХОЛОШНЯЙ", у церкви Св. Параскеви у Софиї, 15. октобра 1998. р.
13. Лїта Господнього 2009. хор "РОЗАНОВ" зробел єдно значне подняце. Зняти, отже, матерял за видаванє першого ЦД-а, хтори достал назву Крачунски Литургийни писнї и коляди. Тринаста нумера приложеней анфтолоґиї - С нами Бог представя богослужебну писню зоз Повечерия велького (у народзе познате з назву саночне), хторе ше служи на предвечериє швета Рождества Господа нашого Исуса Христа. Мелодию Соловецкого манастира художествено обробел и гармонизовал современи православни композитор, епископ Ийонафан (Єлецких), а стихи ґу спомнутей писнї вишпивує протоиєрей ставрофор Йоаким М. Холошняй.
14. & 15. Отче наш - карпаторуского розшпиву и читанє Євангелиї зоз Служби Нєдзелї о заблудзеним синови представяю два вибрани часци зоз знїмку цалосней БОЖЕСТВЕННЕЙ ЛИТУРГИЇ СВ. ЙОАННА ЗЛАТОУСТОГО, у виполнєню Семейственого хору "ХОЛОШНЯЙ", хтори бул технїчно змайстровани у єдним приватним студию у Суботици, а аудио-касета истого материялу була од Парохиї Рождества Пресвятей Богородици видата з нагоди 1000-рочнїци покресценя Руси, Лїта Господнього 1998.
16. Солистичне шпиванє о. Йоакима ексапостилария зоз Пасхалней Утринї - Плотию уснув, представя канонску мелодию простопиния карпаторуского розшпиву, а за нїм ушлїдзуюци рефрен - то повторенє трогласно шпиваней истей писнї у обробки Татиани Холошняй - Барна. Тота нумера, то вибрана єдна часточка аудио-знїмку цалосного пасхалного богослуженя Воскресней утринї, хтори бул одробени у Радию Нового Саду, а зоз закладаньом и поштреднїцтвом визначного музиколоґа Душана Михалека.
17. Оглашительне Слово Йоанна Златоустого зоз "Воскресней Утринї" - виривок видатей лонґ-плейки обєдинєних хорох "Руссикуму" - Рим; Швайцарского хору "РОМАНОС", и "СЕРҐИУС" - Вайнґартен (Нємецка). Знїмок справени 1983. р.
ПОЗНАТИ ПЕТЯНЦИ
Зоз цалим бреговитим жумберацким крайом у Горватскей, грекокафтолїчески Руснаци були од снованя Крижевскей епархиї 1777. р. физично повязани. Голєм у тим смислу, же нє мале число грекокатолїцких руских священїкох окончовали по жумберацких грекокатолїцких парохийох свою паноцовску службу и там препровадзали, зоз своїма семействами, чийо дзеци там приходзели и на тот швет, свойо каждодньови животи. Єден зоз найменших валалчикох и парохийох у жумберских лєсох и горох, без сумнїву розруцане населєнє Петьно (Пећно - општина Јастребарско).
Од 1959 -1963 р. у тамтейшей медзи лєснима велїчезнима древисками скритей малючкей церквочки, пошвеценей "Малей Матки Божей", свою єрейску службу одправял о. Йоаким Холошняй, а зоз його панїматку Амалию, там ше им народзели и перши тройо од седмерих дзецох: Николая, Борис и Михаил.
Од наших бачванско-сримских душпастирох у Петьну службовал и паноцец Симеон Хромиш.
Гоч малючке и лєдво дакому познате месточко - Петьно винїдрело значни, преславени, и високодосяжни персонажни особи. Найпознатши медзи нїма, без озбильнєйшого сопроцивнїка, бул филозоф википедийного значеня, Симеон Чучич, презвитер грекокатолїцкей Крижевскей епархиї, дохтор филозофиї, лоґики, метафизики и етики, порядни ординарий катедри и викладач на реґионалней академиї у Заґребу. На горнїх фотоґрафийох одскенирани даскельо боки єдней його, 1815. року побликованей латинскей и филизофиї пошвеценей кнїжки, хтора ше находзи у библиотечним фондзе "Рускей Одлоги".