MAНАСТИР у Дюрдьове

СЛОВО ОГЛАШИТЕЛЬНЕ УПРАВИТЕЛЯ ДЮРДЬОВСКЕЙ ПАРОХИЇ

о. МИХАИЛА ХОЛОШНЯЙ – МАТЇЙОВОГО, И

ЧЛЕНОХ ЦЕРКОВНОГО ОДБОРУ ОБЩЕСТВА

ПО ВОПРОСУ СПРОБИ ПРЕДАВАНЯ ЗДАНИЯ МАНАСТИРА У

ДЮРДЬОВЕ

Нашенко киновитского женского монашества медзи Руснацами Бачки и Сриму руцене першобутно и першоначално, у поровнованю з другима бачванско-сримскима парохиями, праве на тло Дюрдьовскей парохиї, и то з рукох пожертвовного и аґилно «во время оно» дїйствуюцого першого дюрдьовского администратора, о. Андрея Лабоша – младшого. Пошведоченє того твердзеня фактографски документоване зоз зачуваним писмом истого священїка у архиви Дюрдьовскей парохиї од 12. септембра, Лїта Господнього 1901., хторе о. Лабош упутел «Прешвитлому пан епископови, премилосердному отцови», кир Юлийови Дрогобецкому у Крижевцох.

Надпоминаюци у писме, же уж єдна дївица зоз Сриму Серафина Ердельова вступела до монашеского общества Василиянкох у Ґалициї, а єдна друга ґдовица праве зоз його Дюр-дьовскей парохиї, Мелания Тиркайла р. Орос, до заєднїци Шестрох Служебнїцох Пресвятей Богородици, хтора ше пре здравствени особни причини, после єднорочного новици-ятского периоду врацела дому до Дюрдьова, о. Андрей Лабош заключує же у нашим народзе єст запрос и чувство позбутосци пре нєиснованє манастирских обществох, хтори би могли буц и защита и «Ангели Хранителї од застрашуюцей душевней погибелї медзи тим морално препаднутим шветом нєшкайшого вику, як парохяном так исто и їх дзецом».

Праве прето, о. Лабош модлї преосвященого владику Дрогобецкого, же би допущел, же би ше иницировала «зберачка од нашого руского народу прилогох на тоту намиру, же би ше у нас у Дюрдьове чествовани шестри Служебнїци Пресвятей Дїви Богородици настанєли», а парохиялне общество ше обовязує же шестром обеспеча хижу и рочно пе-нєжну своту за витримованє у висоти од 600 коруни.

Допущенє и благослов за тото «боголюбне и плeменїте подняце» од владики Дрогобецкого нє требало длуго чекац. Точно на швето Рождества Пресвятей Богородици и присно Дїви Мариї (Дюрдьовски кирбай), 21. септембра 1901. р., владика Дрогобецки подписує службене допущенє инициятиви формованя женского манастира у Дюрдьове – першого на територийи бачванско-сримскей часци Крижевскей епархиї.

Збераню средствох за манастир нєодложно дати шлєбодни и швидки ход, такой по дос-таваню владического допущеня. Нєодлуга купена и хижа (на самим углє Главней улїци и Свиленого шору, на боку ґу Девеню, нєшкайша «Руска карчма»), за 3000 коруни, за потреби формованя монашескей, женскей заєднїци, и цале Дюрдьовске общество було у об-чекованю скорейшого приходу перших монахиньох.

На вельку жалосц и нєзадовольство самих Дюрдьовчаньох, идея снованя першого ма-настира у Бачки и Сриме праве у Дюрдьове зашнїцело ше зоз премесцаньом о. Андрея Ла-боша – младшого 1903. р. на векшу парохию – до Коцура. Прешвечени до особней заслуги зисцованя зачатней идеї о снованю манастира шестрох Служебнїцох у задунайней часци Крижевского владичества, отже у Бачки, о. Андрей Лабош бул нєпорихтани «идею» придац до рукох свойого нашлїднїка о. Максимилияна Храниловича, та пренєс нє лєм самого себе до Коцура, алє и назберани манастирски пенєжни фонд за оправку и реконструкцию купеного обисца у складзе зоз потребами монашескей заєднїци, цо при дюрдьовских парохиянох виволало розчарованє, нєодобрйованє поступку, та аж и гнїв и бунт.

Тот поступок була и причина формованя общенародного паметаньям о знєваженю труду, подняцох и ктиторскей интенциї дюрдьовских и других парохиянох, союзно з першобутно «боголюбним и племенїтим дїлом» снованя женского манастирского общ-жица у Дюрдьове. Обмануце остатнїх ше состояла насампредз у нєвиполнєню жаданя самих кти-торох, дюрдьовчаньох у першим шоре, алє и велїх других зоз шицких наших бачванско-сримских парохийох, дзе и на яки способ маю буц похасновани їх добродзечни прилоги. А воля и намена ктиторства би мала буц, нє лєм зоз моралного боку, алє аж и у складзе зоз церковним правом, «святая святих» и нїяк ше ю нє шме преунапрямиц инкадзи. (Кан. 1016):

«Прилоги хтори ше даваю на одредзене намиренє, можу ше похасновац лєм на тоту ствар» (CCEO, кан. 1016).

У парохиялним лїтопису Дюрдьовского общества з назву «История гр. Каϑ. Рускей парохiи Дюрдьов (Дюрдьево - Sajkásgyörgye), находзацей ше у комитату Бачбодроґ, у краю Шайкаш, Кральовини Угорскей», хтори започал писац перши меновани парох дюрдьовски о. Дюра Биндас, тиж зазначена спомину достойна историйна подїя порушаня подняца снованя женского манастира у Дюрдьове, одже, з таким заглавийом и тима сло-вами:

«Покрет за манастир»

«У тим чаше (1900 -1901) полни одушевления млади священїк епархиї у Заґребе Дионисий Няради започал акцию, же би ше у нашей епархиї основали женски манастири, на примеру гр. Каϑоликох у Ґалициї. Найприкладнєйши терен указал ше на то праве Дюрдьов, котра парохия напредовала баржей як гоч хтора у епархиї. Администратор А. Лабош мл. Дзечнє усвоєл тоту думу та з помоцу других священїкох и аґилних вирнїкох на фришко ше назберала красна сума 3000 коруни, за хтору купена хижа на першим углу идущи од церкви ґу валалу Сентиваню» (Паноцец Д. Биндас у лїтопису дюрдьовского церковного общества нєточно приписує идею снованя женского монашества у Крижевскей епархиї владикови Дионисийови Нярадийови. Осно-воположнїк идеї бул заж лєм перши администратор Дюрдьовскей парохиї – о. Андрей Ла-бош).

Лабошов нашлїднїк Максимилиян Хранилович, нє маюци вибор, окрем помириц ше зоз фактом, же идея снованя манастира у Дюрдьове зоз назбераним фондом за отримованє ис-того однєшена до Коцура, предал купену хижу за манастир и купел другу, сушедну обок коло церкви, тиж за 3000 коруни, и на тей порти о даскелї роки (1909.) дал збудовац красне зданиє нового парохиялного квартелю.

Заж лєм, жаданє у Дюрдьове зисциц першобутну идею снованя женского монашеского общества, дожило свойо витворенє 1942. р. Благодаряци, знова ше зявююцим благонамир-ним ктитором боголюбного и племенїтого дїла, єднозначно основац манастир у парохиї Дюрдьов, родичи перших насельнїчкох будуцого манастира як тал своїм дївицом придали даскельо ютра жеми, а тота материялна основа, як и всещедра и всестрана помоц самих дюрдьовских вирнїкох, помогла же би ше збудовал манастирски будинок и започал богу-пошвецени живот перших дюрдьовских монашкох.

На просто нєзадумлїви способ, Дюрдьовски манастир ше по велїх рокох од випражнєня у смислу «самуюцого» жица богупошвецених женских особох – знова предава. (Уж єдна спроба, на барз подобни способ, уж ше раз прейг новинскей оглашки, а през повидоменя актуалного пароха о. Йоакима Холошняя, 80-тих рокох, предавал. Невироятносц ше сос-тояла и у тим, же виштрижок зоз новинох о предаванки на парохию принєс нєприємно застати з спробу предаваня манастира парохиян – Петро Кишов). И тераз ше манастир предава, а управитель парохиї зоз комплетним управним целом Дюрдьовского церковного общества – Церковним одбором, о тим нїч нє зна. Чи то у шоре? Чи предавачом зошицким нєинтересне обществене думанє дюрдьовчаньох, насампредз їх парохиянох? Чи то у шоре, же управа общества о намири предаваня манастира дознава од обичного физичного лїца, Заинтересовани купец, приходзаци на парохию поинформовац ше о предаванки, условийох и цени, медзи иншим, сам виповед и свойо намиренє од манастира направиц викармнїцу швиньох зоз нєобходнима кармиками и валовами. Кед би ше то случело цали валал би з гнївом и вельким розчарованьом брундал и безпомоцно висловйовал свойо нєзадовольство насампредз на управу церковного общества, же ше на месце манастирского здания, зоз пошвецену каплїцу, дзе ше одправяли на пошвеценим жертвенїку Божествени Литургиї. И як ше претолкує веряцому людству правило, же ше нєрухомосц пошвеценого на «мощох мученїкох» пристола, потупело и кощунствено на його месце справела одиозна викар-мнїца статку?

Чи у шоре и по чловечески, же Дюрдьовске церковне общество, о предаваню манастира нє достава обвисценє и пояшнєнє, нїт од верховней владическей власци, хтора у юрисдик-цийним смислу власнїк обєкту, нїт од управи монашеского чину Служебнїцох хтори пре-тенденти на спомнути обєкт? Вшелїяк, же нє у шоре, и абсолутно є, мегко поведзене, нє-шумни и нєкоректни поступок.

Церковни одбор у вязи з описаним вопросом отримал позарядову схадзку и єдногласно висловел свою застатосц з способом; з яку методолоґию ше сце одцудзиц заєднїцке ду-ховно добро як Дюрдьовскей парохиї, так Владичества Святониколаєвского – Руски Ке-рестур, и на концу Чину шестрох Служебнїцох. Злюдно би було позберац шицки три правни твари, же би твар шицких нас остала «чиста», же бизме шедли и предискутовали тему предаваня манастира.

Члени ЦО Дюрдьовского общества, би ше евентуално зложели зоз предаваняом, кед би ше, як ше на схадзки висловели, на месце манастира зявел, чи старецки дом, чи даяка друга установа од общого хасну за руску заєднїцу лєбо за цали валал, а нє одиозна викармнїца ношительох и жридла холестеролу и велїх шерцово-васкуларних хоротох жительства.

Як управитель парохиї чувствуєм з тей нагоди, и союзно зоз начату тему, обовязку, уряд владичества спозориц на єден наш заєднїцки алармантни проблем, цалого нашого владичества. Хвильково анї єдно Церковне общество у владичеству нє ма квалификовану особу хтора валушна у подполним обсягу окончовац дзияцку службу. Ище ше єдино у Дюрдьове служа шицки традицийни богослуженя, а єст и дзиячки хтори владаю зоз цалим обсягом нашого канонского карпаторуского церковного простопиния и осмоглашнїка. Находзиме ше у чаше Велького посту за хтори богослужебни устав предвидзує служенє стредами и пиятками Службох Преждеосвящених Дарох. Од шеснац парохийох у нашим швижо новооснованим владичестве лєм у єдней парохиї ше служи Преждеосвящена – ус-тавно, у катедралней церкви ощербено и накарадно, у конкатедрали абсолутно нїяк, а за Коцур, од кеди нєт дзияка Арвая, нє знам нїч повесц. И то шицко. А нє так давно, Прежде-освящена ше служела и на найменшей парохиї. Подполна деґрадация богослужебного живота нашей поместней Церкви.

Праве прето нє тримам за почежкосц присц на просту идею, кед би ше то жадало, же би праве тот дюрдьовски манастир, поведзме, могло вихасновац так, же ше предложи управи Чину Служебнїцох, населїц манастир зоз єдну-два монахинями, хтори би мали основне задлуженє вишколїц ше при ище владаюцима зоз простопинийом дзиячками, за дзияцку службу, а потим би вони сами свою фаховосц у тей дїялносци могли пренєсц на други особи хтори буду фахово и полнообсяжно окончовац дзияцку службу по других наших парохийох. Праве їх дзияцке служенє, одправянє церковнїцкей и дзвонарскей служби, могли би буц и материялни жридла їх еґзистенциї у Дюрдьове. Вельки запрос за особами хтори допатраю старших, и нєвалушних ше о себе самих старац, могол би буц ище єдно додатне можлїве жридло материялних приходох за еґзистенцию шестринства.

И на концу заключенє: Ми долуподписани члени Церковного одбору, на чолє зоз своїм священїком виражуєме свойо нєскладанє зоз способом на яки ше окончує предаванка зда-ния дюрдьовского манастира. Аж ше и грих роби вельки, нєпочитуюци першобутну интен-цию шицких ктиторох манастира хтора нєспорно була: Снованє женского манастира и то єднозначно у Дюрдьове. Канонске право Восточних Церквох то ясно и єднозначно предпи-сує.

Поволуєме вашо преосвященство, же бисце иницирали сход и дискусию шицких за вопрос заинтересованих, и же би ше вичерпно и у согласию предискутовала тота тема, и же би ше принєсло правилне ришенє по тим випухнутим проблему.

Здрави останьце и з Богом! Дюрдьове, 17. 03. 2019.

предсидатель ЦО – Янко Салак

касир ЦО – Владимир Кухар

Михал Папуга

Мирослав Сеґеди

Иван Ґубаш

Любка Гирйовати

Любка Сеґеди

Мелания Саламун

Славица Барна

Анна Иґрачки

Управитель Дюрдьовскей парохиї – о. Михаил Холошняй – Матїйов